сущ.; -ди. -да; -ар, -ри, -ра инсандин кьилел алукӀун патал хъицикьдикай ва я парчадикай цванвай затӀ. # ~ алукӀун; ~ хутӀунун; ~ цун; ~ акъадун. Абурун вилик квай бармакдиз халкьди къара пулар ва гимиш пулар вегьезвай. С. С. Жувакай ихтилат. Хурум чекме, бухари бармак кьилел Алайбурун чин чӀуру яз алугдай. А. Ф. КьатӀ-кьатӀ авур зунжурар. КӀевидаказ агална рак, Лугьуда хьи: И бармак Гьарам хьуй заз, эгена ХтайтӀа лам текьена " X. Т. Агъакишидин лам. Синонимар: бапӀах, кьеркь. * къармукь ~, жинжин ~, чал ~, япар алай ~
* бармак вилера гьатун гл.; беябур хьун. Адаз бубадин бармак вилера гъатпна кӀанзавач. Гь. Къ. Свас.
* бармак вилера тун гл.; ни нин беябурун, уьзуькъара авун. \[ Къурбан \]. Ша вун Аллагьдиз килиг, на икьван крар ийимир. Ша на зи бармак вилера твамир. Ша на зун халкьдин чина уьзуькъара ийимир. Гь. Гь. Адетдин къармахра. \[ Али \]. Эхь! Вун бегьем диде тиртӀа, вахъ акьуллу рушни жедай. Ада бубадин бармак вилера твадай кар ийидачир. Ам зи руш яз амач. Н. И. Гьакимрин папар.
* бармак кьамал алайди сущ. дамахар ийизвайди, гвайди. Са юкъуз Жафер куьчедай хкведайла, - АтӀа бармак кьамал алайди аку, гилани бубадин салакъа гуз хьанвач, -лагьана дишегьлийрин арадай ван хьана адаз. А. Ф. Бубадин веси.
* бармак цавуз вегьена чилел аватдалди ( ахватдалди ), \[ хкведалди \] лап тӀимил вахтунда, куьруь муьгьлетда. ЦӀарухва: НихетӀаз бармак цавуз вегьена аватдалди хуьр, вири садни амачиз колхоз хьана, мал-къара, виктуьрез, цанкаца, кӀвал-югъ, сад ийиз кӀанзава. Гь. Гь. Колхоз. Зи рикӀе авай мад са мурад кьилиз акъатна: бармак цавуз вегьена, чилел ахватдалди заз зун лекьерилай вине хьун кӀандай... Ингъе, дегьзаманадин Уружали къе лекьерилай вине ава. Къ. М. Птул руш. Бармак цавуз вегьена хкведалди кавха хьана лугьуз, ваз зун гьикӀ аквазва. Гь. Къ. Четин бахт. Синонимар: бапӀахдин \[бармакдин\] пад элкъуьрдалди. # жува еке авур ~ жуван вилера гьатда, бубадин ~ хцив кьадач.
* бармакда тӀвал, кьиле гар авай прил. акьулсуз. Йикъарикай са юкъуз Гуьлдестединни колхоздин бригадир Мисриханан къалмакъал хьана. Мисрихан бармакда тӀвал, кьиле гар авай жегьил тир. Н. А. Кьве рикӀин хиялар.